GUZTIONTZAKO SEXU-HEZIKETAREN ALDEKO ADIERAZPENA.

 

Adin guztietan, denentzat eta pertsona bakoitzarentzat, sexu-heziketa desioen eta plazerren eremuari leihoak irekitzea izan daiteke. Sexualitate-eredu bidegabe, estigmatizatzaile, diskriminatzaile eta bortitz batetik aldentzen lagunduko diguten ateak irekitzea izan daiteke. Sexualitatea demokratizatzeko bideak irekitzea izan daiteke, ikuspegi bidezkoago, horizontalago eta anitzago batetik, gure eskubideez, gorputzez eta bizitzez goza dezakegun munduetan bizitzeko.

​

Zerk bultzatzen gaitu manifestu hau egitera?

Sexu-hezkuntza integrala ezartzeko eskatzen duten nazioarteko gomendioak eta ordenamendu juridikoan dauden legeak gorabehera, eta harreman positiboak, osasungarriak eta berdintasunezkoak sustatzeko funtsezko elementua dela onartu arren, ikusten dugu aplikazio praktikorako blokeo instituzionala eta politikoa dagoela, eta horrek urratu egiten duela haur eta nerabeek sexu-hezkuntza integrala eta kalitatezkoa jasotzeko duten eskubidea.

Azken urteotan, eskuin globalarekin eta neofaxismoekin lotutako hainbat fundamentalismo politikok diskurtso desitxuratuak egiten dituzte etengabe komunikabideetan, Espainiako Estatuko ikastetxeetan ematen den sexu-heziketa ahula kolokan jartzen dutenak. Sexu-hezkuntza zergatik jarri duten jomugan ulertzeko, beharrezkoa da ulertzea sexu-hezkuntzak lotura estua duela berdintasunaren, sexu- eta genero-aniztasunaren eta sexu-eskubideen defentsarekin, eta horrek esan nahi du pertsona guztiek eskubide guztiez gozatzeko aukera izan behar dutela. Horregatik guztiagatik, eta giza eskubideak eta, bereziki, sexu-eskubideak, egunero defendatu behar direla dakigulako, gaur manifestu hau kaleratu dugu.

Zer da sexu-heziketa?

- Sexu-heziketa da pertsonekiko eta haien eskubideekiko errespetuan oinarritutako balioak sustatzen dituena.
- Sexu-heziketa gizarte-desberdintasunen aurrean ikuspegi kritikoa duena da, gizarte-ingurune berdinzaleagoak eta bidezkoagoak sortzen laguntzeko.
- Sexu-hezkuntzatzat hartzen dugu errespetuzko eta berdintasunezko lotura afektiboak sortzea ahalbidetzen duena, bai eta autoezagutza eta identitate pertsonala ere.
- Gure ustez, sexu-hezkuntzak funtsezko zeregina du osasunean eta ongizate pertsonal eta sozialean.
- Sexu-hezkuntza ikuspegi sozial, feminista eta komunitario batetik ulertzen dugu, plazera ardatz hartuta; izan ere, plazerarekin lotuta, pertsonek erabaki hobeak hartzen ditugu gure sexualitateei, gure gorputzei eta gure bizitzei buruz.

Zer aldarrikatzen dugu?

SEXU HEZKUNTZA FEMINISTA ETA KOMUNITARIOAREN ALDEKO SARETIK, honako hau eskatzen diegu Hezkuntza Ministerioari eta hezkuntzaren arloan eskumena duten administrazio autonomikoei:
- Sexu-hezkuntzako politikak eta ekintzak ikuspegi feministatik, sozialetik eta komunitariotik garatzea, hezkuntza-komunitate osoaren inplikazioaren eta parte-hartzearen alde eginez.
- Sexu-hezkuntza derrigorrezko hezkuntza-etapetan formalki txertatuta eta egungo (eta etorkizuneko) hezkuntza-legeriak araututa egotea, Espainiako estatu osoan hezkuntza-berdintasunaren printzipioa bermatzeko.

- Irakasleen prestakuntza-plan zorrotza eta sistematikoa garatzea, sexu-hezkuntza integrala eskola-etapa guztietan ezarriko dela bermatzeko.

- Irakasleen lan-baldintzak hobetzea, eta hezkuntzako inbertsioa handitzea, kalitatezko eskola publikoa bermatzeko. 

- Hezkuntza-eremu formalean zein ez-formalean hainbat ekimen, proposamen eta jarduera garatzen dituzten Erkidegoko erakundeen lankidetza- eta kontratazio-baldintzak hobetzea.
- Zeharkako sexu-hezkuntza integrala ikasgeletan eta geletatik kanpo, haurren eta nerabeen beharrizanei erantzungo diena, ikaskuntzak eskuratzeko espazioak ireki eta lagunduko dituena, pertsonei sexualitateari buruzko erabakiak hartzeko eta lotura afektibo askeak eta berdintasunezkoak ezartzeko ezagutza, balioak eta trebetasunak garatzeko aukera emango diena.

Guztiontzako heziketa sexualaren alde!
Sexu-hezkuntza eraldaketa soziala da!

​

Sinadura: Sexu-heziketa feminista eta komunitarioaren aldeko sarea.

ABD Asociación Bienestar y Desarrollo, Actuavallès, Artaziak Kooperatiba, Assexora’Tgn, Associació Comunitària Anti Sida de Girona-ACAS, Associació de Serveis i Formació socioeducativa, Associació Enruta’t, Candela. Cooperativa d’acció comunitària i feminista, Comitè 1r de Desembre, Cooperativa Cúrcuma, Creación Positiva, Dessex, Eihera Kooperatiba, ETIS, Euforia. Familias Trans-Aliadas, Fil a l’agulla, Filosa Menorca, Fundació Àmbit Prevenció, Fundació Antisida Lleida, Fundació Autònoma Solidaria UAB, Gracia Trujillo , H2o, Lesbianes, Gais, bisexuals i trans* del Camp de Tarragona, Joves per la igualtat i la solidaritat, Juntura Kooperatiba, L’Associació de Drets sexuals i Reproductius, Nus cooperativa, Otro Tiempo, Proyecto Hortensia, RIXU. Asociación de Educación Sexual y Coeducación de Asturies, Rosa Maria Sanchis i Caudet, Sida Studi, Vira Cooperativa Feminista.